中國游泳男神孫楊周二喺俄羅斯喀山嘅世錦賽失金。佢首戰唔太擅長嘅200米自由泳，決賽以0.06秒輸畀英國泳手佳爾，暫時累積1金1銀。
孫楊今次輸咗，而且游出1分45秒20，比個人最佳時間慢成一秒，難免令人失望，不過睇番佢周二嘅頻密賽程，就好難怪佢喇。事關孫楊朝早7點已經起身，進行完藥檢後，就出戰11點嘅800米自預賽，順利首名入決賽後就去按摩放鬆吓，午餐都只係夠時間食碗麵咋，等到夜晚就出戰200自決賽。所以呢，教練張亞東賽後都冇怪責孫楊，仲話已經游得唔錯，但就話如果頭段留力，尾段應該可以頂得住後上嘅佳爾。孫楊今屆世錦賽出戰200至1,500米四個自由泳比賽，周三就會參加800米自決賽。
何詩蓓今鬥「女費斯」
另外，美國18歲女將列迪姬周二喺1,500米自決賽，將自己預賽所造出嘅世界紀錄時間，再推前2秒33，以15分25秒48強勢奪金，比第二嘅新西蘭泳手保莉快超過14秒。
至於香港隊，今日輪到幾日前歷史性游出奧運A標嘅「小美人魚」何詩蓓再度出場，出戰100米自由泳初賽。雖然會同美國「女費斯」法蘭克琳同組，但何詩蓓都冇有怕：「雖然係我第一次參加世錦賽，但冇乜壓力。」另外，佢仲會同師姐歐鎧淳、鄭莉梅同施幸余出戰4x200米自由泳接力賽，目標係頭12名以直入奧運。
除何詩蓓外，港隊今屆已有四人達奧運B標，包括歐鎧淳100米背泳、施幸余100米蝶泳、鄭莉梅200米自由泳，同埋噚日喺100米自由泳游出B標49秒96而位列第37位嘅謝旻樹。淳淳就喺50米背泳以28秒70位列第22位。