商舖市道轉差，自然影響到地產代理。幫美聯舖位部打咗十幾年江山、人稱「Lieman哥」嘅美聯旺舖區域營業董事梁國文（Lieman）噚日已經離職。聞說，佢被人摔數摔到爆，但家陣商舖成交萎縮，佢最終支持唔住，所以離開。Lieman係行內出名嘅跑數王，十幾年前連續幾年做最佳營業員，十年前正式坐正做主管，帶領過香港區，離職前係九龍區揸弗人。佢話離開美聯，唔會轉投細行，要去都去大行。咁唔通過檔中原？佢就答，放完大假，咪知佢去邊喎！