左報日日吹捧建制派、抹黑泛民，建制派立法會議員本應幫襯左報以示支持，但身體真係好誠實，八方從建制派議員喺立法會申報開支睇到，愛國愛黨嘅工聯會立法會議員辦事處，好唔畀面左報喎，《文匯報》、《大公報》、《商報》一律唔訂，反而訂《蘋果日報》、《壹週刊》、《明報》、《星島日報》等。
經民聯石禮謙亦唔幫襯左報，只訂《蘋果》、《南華早報》等。保險界陳健波則只訂《南華早報》同《經濟日報》。言行合一似乎僅有金融界吳亮星，《文》、《大》、《商》統統訂齊，怪不得處事同中央思維最一致。
元秋買書學演說技巧
申報開支亦睇到，經民聯梁美芬年初登報請人，廣告只話請「立法會議員助理」，搵唔到佢個名，只係叫申請人電郵至[email protected]，應徵者去到先知道係做鼠王芬嘅buddy。民建聯元秋蔣麗芸2012年花咗200幾蚊買咗本演說技巧嘅《The art of speeches and presentation》，相信一定受書本啟發而令發言咁出色。