俗語有話：「仇人見面份外眼紅！」不過睇嚟唔係好啱用嚟形容柯震東同埋吳建豪嘅舅仔Elroy！噚日台灣《壹週刊》報道，呢對蕭亞軒（Elva）嘅新歡舊愛，上個禮拜六喺台灣一間雪茄館現身，同場仲有張艾嘉個仔Oscar同女友程穎捷，閉咗關好耐嘅房祖名都有出現。
一攬泯情仇
正當大家玩到興起，柯震東突然用佢嗰對強而有力嘅臂彎從後攬實Elroy，曾幾何時，呢對好兄弟之前玩得好埋，但自從Elva同柯震東分手，跟手同Elroy撻着之後，連帶令呢段友情都告一段落。前排有傳Elroy同Elva戀情亮紅燈，𠵱家又同柯震東咁老友，似乎印證兩人已分手。柯震東透過經理人話之前大家年少幼稚，先會取消關注，𠵱家大個咗就做番好朋友。
另外，舊年喺北京容留他人吸毒罪成，判咗6個月嘅祖名，亦喺柯震東攬攬Elroy嘅前一晚，同埋柯震東、陳柏霖世紀重聚。
撰文：馮仁昭