每季英超，總有啲中型班會突然殺出嚟，喺季初踢出好成績，上季例子就係修咸頓，一度上過聯賽第二位。今季英超將會喺禮拜六開鑼，今期就會講吓邊支中型班最有機會殺出新血路。
小弟睇好今夏換咗領隊嘅韋斯咸，前主帥艾拿迪斯唔係唔勁，只係帶嚟帶去隊波都係中游，冇乜突破。而球會決定唔同艾拿迪斯續約，可見管理層都有心大搞，畀我感覺好似修咸頓當年炒咗艾堅斯、請普捷天奴咁樣。比歷絕唔係無名之輩，教過克羅地亞國家隊，又教過土超嘅比錫達斯。雖然比歷未教過英超，但球員時代踢過韋斯咸同愛華頓，應該好清楚英超嘅風格。
韋斯咸今夏嘅擴軍行動進行得唔錯，首先成功續借到贊堅臣，保持防線嘅穩定性，艾朗加斯威爾、雲斯頓列特同湯堅斯呢班上季重心都喺度。就算新加盟嘅奧邦拿水土不服，韋斯咸都有足夠人手。最重要係中場，韋斯咸買咗一個勁人返嚟，就係前馬賽嘅進攻中場皮耶（圖）。皮耶上季喺法甲踢到曉飛，入咗七球之餘，仲有17次助攻，係上季法甲嘅助攻王，實力應該喺離隊嘅達寧之上。
韋斯咸嘅隱憂係防中，佢哋上季由巴塞隆拿借到桑治，桑治表現非常好，係中場嘅keyman，如果用麥克盧保或者路蘭，相信會比桑治差啲，要睇吓比歷點安排。另一個有利韋斯咸季初爆出嘅原因係，佢哋要踢歐霸盃外圍賽，一早就開操，相信班球員會較早上力。文：咖喱