偉大嘅特區政府又有官員調動，原本對小弟呢個交稅唔多嘅蟻民，真係冇咩大影響，廿幾三十萬畀邊隻，呀唔係，邊位偉大官員都冇咩分別，但對「垃圾桶」嚟講，真係演繹出獅子山下不屈不撓精神；立法會選輸咗，就有副局長撈，政改唔通過，仲坐正做局長，真係越孭鑊越升職。
球壇其實都有越孭鑊越升職個案，紐卡素新任領隊麥卡倫就係呢類人，上季帶打比郡季尾越踢越沉，由原本榜首去到連升班附加賽都冇埋，拎住呢份履歷表都竟然可以in到紐卡素呢份工，而且入埋紐記董事局，真係勁。講開麥卡倫嘅「威水史」，仲有帶英格蘭喺08年歐國盃外圍賽出唔到線㖭；帶禾夫斯堡同諾定咸森林，唔夠一季就俾人炒。
喂，今期唔係講英超黑馬咩？係咁彈麥卡倫，紐卡素今季仲邊有運行？嗱，麥卡倫越孭鑊越升職，就梗係有佢嘅魅力，唔通真係當紐卡素班主艾殊利儍㗎咩！麥卡倫遠古時曾帶米杜士堡拎過英聯盃冠軍㗎，今次重返東北部，應該有一番作為，加上佢帶過川迪贏荷甲，荷蘭方面仲有啲人脈，今夏買入燕豪芬中場韋拿杜姆（圖），呢位「FM妖人」被吹捧咗好耐，到24歲先離開荷甲，唔好預佢太勁，但嚟到英超都有啲期待。講真，紐卡素現有嘅軍容水準唔太差，艾約斯佩雷斯、柏比斯施斯等仲在陣，有一個完整啲嘅體系，應該有作為。而且成日聽紐卡素球迷嘅反艾殊利遊行示威，真係你唔煩我都煩，如果有番成績，球迷自然會收口啦！
文：牽牛