幾個維園阿伯睇症。呢排好多阿伯唔舒服，天口㷫抑或佢詐型？真係𢱑頭。突然有人打尖。
「喂，膠樽伯你做乜咁頻撲，兩頭騰？」
「我搵得個仔又走失咗個老婆囉。」
「細你幾廿歲，肯跟你，貪你身份證啫，不如睇實個仔啦。」
「我畀個衰仔激到氣促呀，正一生骨大頭菜，係被縱壞嘅小混蛋！嬲到想捉佢去坐監──」
「乜咁對你個親生仔呀？咁你咪老混蛋？」
「就因為佢唔係我親生嘅先至重手。」
「哦──明嘅，眼開眼閉啦。惡蟑伯你睇乜症？」
「我驗尿。上個禮拜行街唔知邊個用拳頭打我條腰，驚傷咗個右腎，特登嚟驗吓有冇血。」
「點解當時唔發long嚟？捉住人鬧×佢吖嘛！」
「當時我冇乜感覺吖嘛，忍辱負重成個禮拜──如果個腎有事，男人老狗仲有面嘅？」
「你成七十勾啦，仲得？」
「我唔得唔通蠢茂伯得呀？」
「畀人踢咗一腳，仆街……唔知我撞人定人推我……我從來冇話過有人推我，其實我真係唔知點解會仆……」
「膠樽伯惡蟑伯，你哋唔駛理蠢茂伯，佢思覺失調！」
「逼橋伯你做乜揞住個心？」
「我畀女人個胸襲擊，家吓斷咗兩條pan骨，死得嘞！畀我睇先啦──」