隔牆有耳：
九龍皇帝墨寶Tee拍賣 - 李八方

已故「九龍皇帝」曾灶財4件墨寶將於本周六公開拍賣，最為矚目嘅一件係寫滿曾灶財真迹嘅菊花牌水墨Tee，前後均有九龍皇帝嘅御墨，字體左大右小，底價為8,000至1萬蚊。今次拍賣品包括物主當年拜訪曾灶財時影低嘅4張相，相背面都有皇帝真迹，仲有曾灶財以A4紙寫上聯絡方法嘅「卡片」，以及6張A4紙墨寶，呢幾項拍賣品就不設底價。

負責拍賣嘅普藝集團副總裁莊志崗話喎，物主2001年正值18歲，久仰九龍皇帝大名，拜訪曾灶財位於翠屏邨翠樂樓嘅住所，呈上菊花牌T恤一件畀皇帝當作畫布。莊志崗話，據物主透露，曾灶財仲要求佢買嚟三盒斑腩飯醫肚。雖然充當外賣仔，但獲「御賜」極具價值嘅墨寶Tee，乜都抵番晒啦。普藝兩年前亦曾拍賣一件曾灶財墨寶Tee，底價3,000蚊，以8萬蚊成交。