抗戰勝利70周年，對中共嚟講梗係大事，所以9月3日都喺天安門有閱兵儀式，廣邀各界人士出席，但唔係人人有份，難怪有人忙住撲位。
話說唔少重量級建制派中人、港區人大同政協委員等，一早獲邀9月2號赴京、3號觀禮、4號返港；由於獲邀係身份嘅象徵，據知好多人都回覆出席。與此同時卻有唔少人囉囉攣，因為至今仲未收到邀請，四出向外打探到底仲有冇位剩？八方聽聞連立法會建制派議員都唔係個個有份，情況一如2008年北京奧運開幕禮，認真一席難求。
有政界花生友就笑笑口話，屆時傳媒焦點都係睇吓邊啲泛民肯上京、以此證明仲同中央有偈傾，在場建制派個個變成佈景板，去嚟有乜謂？