個人資料私隱專員黃繼兒（圖）噚日履新，任期5年。曾經長期喺律政司工作、退休離開公務員隊伍前擔任法律改革委員會秘書嘅黃繼兒，本身係執業大律師。黃繼兒第一日返工，就講到近日好hit、好多市民中招嘅跨境電話騙案，佢話如果騙案涉及個人私隱，就會善用法例賦予嘅權力，「我哋義不容辭一定要做」；假若涉及刑事嘅話，就會配合警方調查。
黃繼兒同時強調，會按私隱條例授予嘅責任、權力兼既定機制，聯同所有有關人士保障個人資料私隱權，務求個人權利獲適當保障之時，亦便利資訊自由流通。至於會唔會再修訂《公司條例》加強保障公開個人資料？佢就話會詳細研究，多聽意見喎。