今年首度進軍香港嘅內地金舖一哥老鳳祥又搶租呀！老鳳祥希望喺香港大展拳腳，佢哋年頭租嗰間旺角西洋菜南街與亞皆老街單邊旗艦靚舖仲未開張，啱啱又以約210萬元，搶租旺角「金行街」彌敦道現為六福（590）嘅三層巨舖。
老鳳祥個新舖喺彌敦道648至652號皇上皇廣場地下至2樓，夾埋7,265方呎，對正旺角滙豐大廈。
六福家陣一個月交租230萬元，近排零售業轉弱，佢哋一直想放棄呢間貴租舖，所以曾開價170萬元傾續租，比現租大減26%。老鳳祥偏偏採人棄我取策略，出高六福40萬元搶得舖位而回，租金減一成，最快今個月尾收舖裝修。
連埋最新成交，老鳳祥將會喺旺角有兩間分店。相反，六福就3個月內連摺兩間旺角舖，喺6月底率先放棄旺角好望角大廈地下逾千呎地舖，舖位吉咗，聞說叫租下調，至今仍未租出。