相隔七年，祖雲達斯傳奇球星查斯古特噚日再次現身香港，仲變咗一個凍齡球星，點解？今年一月掛靴、仲三十有七嘅佢，有身形、冇肚腩，連港足鋼門謝德謙都讚佢大把貨；不過，查斯古特就話暫時冇復出或者做教練嘅計劃，仲即場教大家踢「開心足球」！
37歲咁fit全靠開心
查斯古特七年前隨祖記訪港，喺大球場同南華踢咗場友誼賽，今次佢以祖記大使身分，幫母會嘅亞太區官方網上商店啟動儀式做宣傳，同場仲大顯腳法。退役半年，37歲嘅查斯古特大談不老良方原因係「開心」：「退役後嘅生活好開心，我多咗時間同朋友同家人一齊，一星期會同朋友踢一次波，做祖記大使周圍去都係我鍾意嘅。」
擔任司儀嘅Keyman喺活動上叫查斯古特用廣東話講自己個名時都冇托手踭，之後仲同謝德謙及2014年全港學界精英賽嘅神射手廖澔弘，一齊玩penalty kicks。遊戲由查斯古特同廖澔弘輪流射12碼，謝德謙負責把關，結果00年歐國盃決賽一腳射死意大利嘅法國英雄，三次12碼都唔入，廖澔弘就兩射入一球，查斯古特話：「我踢波好單純，係為咗好玩同享受。」
之後我求大俠同佢做專訪時，問佢會唔會嚟香港踢波，查斯古特話暫時冇咁嘅打算。細細個睇法國98年捧世界盃嘅謝德謙就話，如果查斯古特嚟香港落班就好喇：「佢真人好『弗』，保方37歲都未退，佢可以考慮再踢，用佢嘅名氣，喺唔同層面感染更多人踢波都唔錯。」
講到出年喺法國舉行嘅歐國盃，查斯古特當然睇好東道主可以捧盃：「喺自己國家比賽有一定壓力，但相信法國教練可以帶好隊波，攞到冠軍。」查斯古特今日就會離港去上海繼續祖記行程，噚晚就去咗食上海菜，認真識嘆。