阿里巴巴創辦人馬雲真係好有決心推行業務全球化，新近新開一個總裁位置，請嚟57歲嘅高盛前副主席Michael Evans坐呢個位。
Michael Evans相當猛料，普林斯頓畢業，1993年加入高盛，翌年已經升做合夥人，即使係2008年金融海嘯之後，佢都可以一路步步高陞，做到副主席，睇嘅業務由歐美到亞洲，夠晒國際視野，佢2013年先至退休。
不過，名牌大學兼大行阿頭，呢啲都係等閒事。Michael Evans最勁就喺1984年奧運會，代表加拿大划艇隊，攞咗個8人划艇金牌，當時仲要係同佢嘅孖生兄弟一齊出賽，呢啲背景真係唔多人有。
阿里舊年9月上市，都搵咗佢入董事局做獨董，轉眼約一年，就請佢正式做總裁，專門搞全球化業務，除咗電子商貿，雲計算、流動平台同出入口等，Michael Evans都會負責幫阿里「走出去」，並向首席執行官張勇滙報。話時話，近排阿里股價認真麻麻地，搵個猛人返嚟沖喜吓都好嘅。