老婆有何「功能」？買餸煮飯？洗衫湊仔？No！以上只屬小男人主觀願望，現代「老婆」隨時上述任何功能也不用有，因她們的人工隨時高過老公一大截！不過，對有權力、有地位的大男人而言，一些「特別功能」卻是必要的，例如做「擋箭牌」。好似唐唐選特首時被揭家中有僭建，其太座立即跳出來聲淚俱下話：「我做嘅！」就是最佳例子。
至於國際球壇的太太們，成為擋箭牌亦是家常便飯，像上周雲高爾被記者問及會否與曼聯續約，佢立即搬老婆出嚟：「我應承咗太太完約（2017年）就退休陪佢，之前我已同佢講55歲退休；但我𠵱家都64歲喇！」一聽就知雲帥係用老婆卓露絲耍啲傳媒：若這兩年在曼聯冇成績，雲帥便大可「兌現承諾」走人，贏唔到冠軍都贏到好老公稱號；再者，你都呃咗老婆九年，可能卓露絲本人都唔相信老公會為自己退休。若教得好，高層開出優厚續約條件，咁發誓亦可當食生菜！總之，雲帥自此不用再回應其去留問題，高招！
當然，有好多老婆唔止煮飯、湊仔同做擋箭牌，仲係會為另一半揀選最合適前途的賢內助。像費格遜太太在2001年費Sir欲退休時，立即勸佢諗清楚，最終令費Sir收回成命，並多贏一屆歐聯同六屆英超；維多莉亞如何將碧咸打造成國際巨星，亦不用多說。要做成功男人，先要成功搵個背後的女人。
方栢翹
now足球評述員