大記者來電，話灣仔大榮華肥佬韜有新搞作，通知咗佢會辦一場「塘西風月宴」，叫我地得閒就組班去食，不過又唔好太多人噃，頂多兩圍，否則肥佬韜難以應付。
塘西，我地呢一代所知甚少，細佬哥時就聽先父講過一啲八卦逸事，不過塘西鼎盛時期，先父還是少年人，雖然家住西營盤第三街，離石塘咀不太遠，但無資格到塘西（屈地街至卑路乍街之間嘅皇后大道西與德輔道西地段）玩樂，所以先父講嘅故事其實係從二三手傳聞聽番嚟嘅。1933年英國禁娼，殖民地香港也得跟隨，於1933年6月30日妓寨全面停業，但因從業人員眾多（單係妓女便有一萬人）為免影響過大，特別給予三年寬限期、1935年石塘咀妓寨正式執笠，於是一段塘西風月史，由1905至1935年，剛好30年，就此告終。
1935年出生之人，今年已有80歲，能夠話自己有塘西一手經歷嘅，起碼一百歲過外，相信全港未必搵到一個半個。
肥佬韜之風月宴菜單，唔通係做過一番資料搜集，慢慢拼集而成嘅？大記者傳來一睇，哦，原來係韜哥玩文采啫，啲餸菜早已有之，大榮華日日賣緊，「新風月菜」只係改變名稱之嗎，但又改得幾風雅，試吓無妨。
（一）米已成炊，珠胎暗結、（二）花田喜事牡丹開、（三）燈前月影輕伴小蠻腰、（四）鰲頭獨佔喜暢飲、（五）綠楊樹下垂青絲、（六）莽漢醉折長亭柳、（七）西海漁皇添錦衣、（八）丹鳳朝陽領風騷；再加金醬茄子燜手打麵，庶糖補腦包，紫氣東來水晶包，壹席十二人盛惠4280元。上述菜式名字好似係燈謎謎面，想知謎底不妨去試吓。
大記者當然不懂塘西之事，但佢勝在搵慣資料，來電話佢嘅已故老友吳昊生前出版咗一本《塘西風月史》係到目前為止，佢見過市面上寫石塘咀娼妓歷史最好嘅一本，對香港掌故有興趣者，應買番一本讀一讀。吳昊係好嘢嘅，佢係現代人，憑努力搜集材料，寫成一本「塘西風月史」，讓本土一段社會傳奇史呈現在21世紀讀者眼前，我地要感激佢。今日有年輕人自稱本土派，好似只識上街示威抗爭，不如向真正本土派吳昊學習，寫番幾本有關香港社會歷史書啦。