上季「龍華」系馬共贏咗五場，謝太你滿唔滿意呢？
「一般啦，好似我自己咁講吖，其實等咗好多年，先等到第一場頭馬，實在等得比較耐，我講自己隻『國粹精華』呀，希望贏完之好今季會更好啦！」
嘩，有馬贏都唔係太滿意，呢位謝太何方神聖呀，原來佢就係深圳龍華鎮首富，百億富豪謝國輝的太太。
謝太原名邱月華，後來改名叫金沛橋。除咗馬主身份，佢仲係出品人投資電影，處女作《黃金福將》年前喺大陸上映，謝太乖乖女都有客串一角。上個月佢又開戲，搵來安志杰同佢女友Jessica C.，以及伍允龍、吳建豪等拍動作片《潛龍狙擊》。
點解謝太有興趣搞電影呢？「我其實一直有做影視呢瓣，之前《黃金福將》係獨資，今次呢齣就搵啲有經驗嘅投資者一齊合作，希望口碑票房俱佳！」
投資拍戲可賺可蝕，養馬都一樣，謝太老公用750萬購入一匹「金珀龍華」，隻馬至今成績唔錯，但謝國輝只攞番二百零萬獎金，仍未回本。
謝太說：「『金珀龍華』上季贏三場都OK啦，Gary（練馬師吳定強）好畀心打理，雖然上季最後三場演出欠佳，但希望暑期休息後可回復好表現。」