有傳媒查過議員利益申報後，狂插泛民議員用公帑買IT潮物，呢種講法未免太睇小建制陣營，事關佢哋當中都不乏識貨之人，包括自詡為「第一代IT人」嘅民建聯鍾樹根。
八方都睇過呢啲申報資料，發現Tree根買畀夥計用嘅機好普通，都係啲聯想、DELL，甚至連黃金砌機都有；至於佢自己就犀利喇，用Sony！前年3月佢買咗部VAIO用，點知用咗啱啱一年，就話部電腦電池有問題，可能導致部機過熱，成功獲廠方退款。佢交番筆退款畀立法會之後冇幾耐，又返去Sony買新機用。唔單止咁，Tree根舊年9月買咗部佢口中嘅「愛國」牌子HTC One（E8）嚟用，用到今年5月就話喺的士唔見咗，仲提供埋報案紙做證明，跟手又換咗部今年3月先出嘅HTC One E9+。
佢嘅黨友元秋呢，舊年年頭花咗萬五蚊買部15吋MacBook Pro，同時再用多2萬幾蚊買咗套Adobe CS6 Master Collection，識貨嘅人就知道，呢套係好專業嘅數碼媒體創作軟件，唔通元秋想轉行開製作室？