一隊球隊若然輸咗波，豈只換人咁簡單？領軍無方嘅領隊，好多時都會被換走，唔想俾人叮走，就梗係要賴球員！好似率領3司12局嘅特首梁振英，就用呢一招！嗱嗱嗱，八方都係轉述工業界立法會議員林大輝嘅意見，以波論政嘅大輝斥CY只識紙上談兵，用人唯親派屎波球員上陣，恐防最終因為輸而被班主換走喎。
曾經做過本港多個職業足球會班主兼係波牛嘅大輝法師，對CY隨意換走曾德成同鄧國威兩位前局長唔多like，佢噚日喺報章專欄批評作為特區管治領隊嘅CY，冇能力簽到優秀問責官員做球員，球隊質素同能力參差不齊，但CY竟然為輸波搵藉口，諉過部份表現不過不失嘅球員，「匆匆將他們開除」，但就容許表現差劣嘅愛將喺球場上行行企企。
不斷開空頭支票
佢特別提到呢位領隊用人唯親，胡亂排陣，矛頭包括民望最低嘅陳茂波同吳克儉，「由不熟悉土地房屋的人去處理土地房屋事務，不了解教育的人掌管教育政策，就等同要前鋒球員改踢後衞，守門員廖化作先鋒，球隊自然有輸無贏，球迷（市民）嘅不滿情緒與日俱增」。
查實睇番梁班子施政連番甩轆，確實又可以用屎波形容，但與其諉過球員，大輝覺得領隊都要負責，佢話領隊若然不斷開出空頭支票，為班主同球迷製造假希望，交唔到功課點向班主交代？最後以「而班主為免球隊繼續沉淪，恐怕亦會考慮忍痛換人（領隊）」作結，唔通係意有所指？
李八方
mailto:[email protected]