「洗米嫂」周焯華老婆陳慧玲噚日傍晚6點喺中環現身，神采飛揚面部飽滿，佢單拖去咗名店Joyce掃貨，買咗一大袋戰利品，同場仲見到黃曉明喺店內掃貨，據知，洗米嫂係買禮物出席太陽娛樂董事總經理黃柏高（Paco）嘅64歲生日派對，噚晚Paco喺銅鑼灣補祝生日，老闆洗米華兩公婆都畀面出席，不過分開到場喎！
之前洗米嫂坐月期間，老公竟然去咗新加坡陪Mandy Lieu，激到洗米嫂紮紮跳，據知，雖然洗米華送珠寶又送樓，但都未𠱁番掂老婆大人，所以噚晚兩公婆各自到場，洗米嫂喺近晚上8點單拖率先現身，問佢送乜禮物？洗米嫂話：「買咗啦！」大約半粒鐘後，洗米華姍姍來遲冇接受訪問。
劉浩龍再道歉
噚晚太陽娛樂群星方力申同女友鄧麗欣、崔碧珈、曾國祥等拉隊到賀，仲有之前喺社交網發表「污糟手」論被全城鬧爆嘅劉浩龍（師兄），事發多月後首次見人開腔回應嘅師兄再道歉：「發生近兩個月，不斷反省，係自己詞不達意，如果大家有hard feeling真係唔好意思，自己應承咗家人朋友老闆，以後小心啲。」問到連累埋女友容祖兒，師兄話：「當然會唔開心，唔希望連累任何人。」
師兄仲澄清冇同何超儀借100萬，相識18年冇牽涉金錢，又承認自己搬咗屋，但唔係報道話7萬月租，架車就換咗一年，都係二手車要供。
撰文：馮仁昭
