最近跟一位廣告界朋友見面，提到現在好多品牌透過社交網絡，以最低成本為品牌「build好感」，今年初麒麟啤與早前Snickers大玩政界人物抵死語錄就是例子。
想深一層，不只產品利用社交網絡build好感，政界人物都做同樣事情，最近做得最出色的應該是田北俊。政改投票蝦碌，他隨即在facebook上載一隻豬取笑建制派議員，之後《100毛》話請佢，佢問人工係咪高過劉（江）華？他的確不停抽水，但抽得過癮，亦講中唔少人心聲，在大眾心目中，忽然好感大增。
至於財經圈，一時想不起成功例子，反面教材倒有一個，就是近月經常見報的一間本地航空公司。先不理負面報道，單是在facebook，隨時讀到員工對公司的不滿心聲，當然，這個世界好少見員工日日讚老闆英明，但當日日都有員工在facebook呻，加上這間公司早前擬削薪津而爆出工業行動，管理層要讓步收場，如此日積月累，這間公司想攞最佳僱主獎，應該是十級難度。
還有一點，高c9早前去歐洲一趟，身邊所有朋友都不建議我坐這間航空公司，坐另一間同樣有直航的歐洲航空公司，或者坐中東航空公司轉機都好，這反映甚麼？你懂的。
今時今日，廣告、傳媒、電視行業都因為智能手機的出現，而要諗計轉型、求存，各大品牌都在探索網絡的宣傳功能，航空公司斷不能彈老調，好似以前搵幾位靚女空姐行來行去拍宣傳片，就以為可以build好感。
與其花錢推廣，最直接不如將資源投放在前線員工身上，善待他們，因他們才是為公司提供優質服務，而且最受乘客氣的一群。想人鍾意你，一切都是將心比己。
高C9