東亞銀行（023）噚日下午1點半舉行業績會，75歲嘅主席李國寶可能食完飯先去，搞到飯氣攻心，而且全程大部份時間都交由身邊兩位乖仔李民橋與李民斌，同埋其他管理層答問題，唔使佢老人家出口，寶哥哥於是選擇中途閉目養神，眠一眠先嘞。但所謂人老精，寶哥哥一邊眠，一邊都有聽住大家講乜東東，好似業績會接近尾聲，有人指明要問寶哥哥，係咪等到適合價錢就會賣盤，佢即刻醒一醒，然後好肯定咁話「完全冇諗過」！呢個情形令華華想起讀中學時，上堂釣魚嘅情況。