賤物鬥窮人，日圓低迷，有東京hostel新登場，推出$206宿一宵，誘惑何其大！去年，日本錄得遊客入境記錄有13.4%增長，現時東京酒店提供10萬間房，預計未來3年增多7,600間房，遠遠未能應付2020年東京奧運預計的2,000萬人次需求。
日本發展商Sankei Building Company靈機一動，把秋葉原一幢35年樓齡的辦公樓改建成hostel，名為Grids，位置不錯，9分鐘行到秋葉原JR站，提供100個面積達1.72平方米的床位，共用廁所和浴室，每晚$206，貼心到另設一層女性專用層，可共用化裝間，hostel設有餐廳。
平嘢不一定是單身住客天下，hostel設有家庭房最多4人入住，設私家廁所浴室，包房價$900，不過是四個單人床位，有小朋友要分開瞓，再私密一點，Premium 2至4人房達20至25平方米，一大床加一梳化床，同樣設私家廁所浴室，兼電視機和雪櫃，包房$1,124；面積最大的日式4人榻榻米房達28平方米，簡約設計甚有無印feel，包房價$1,250，每位不過$313，比一般經濟蚊型酒店更平。
相片來自Grids Hostel及UDS facebook
網址： http://grids-hostel.com/
記者：孔詠詩