今季高層重組嘅飛馬，噚日喺中環開記招公佈新球衣，我求大俠當然落去八啩吓，佢地仲搵到前曼聯球星沙柏嚟撐場，不知幾有面子。不過佢哋主場戰衣竟然由黃色變紅色，望埋去同南華主場衫差唔多，唔知係咪同前南華足主羅傑承太太、梁芷珊做飛馬主席有關呢？
飛馬過去三季冇成績，上季連盃賽決賽都入唔到，今季由羅太揸旗，轉波衫顏色係希望轉運喎。羅太解釋，主場波衫係以曼聯款式為本，以紅白配搭，作客以白黑為主；唔用黃色主要係行政層面嘅考慮，希望畀到外界耳目一新嘅感覺同運氣喎，但就冇解釋點解同南華一樣係紅色。
外援晒冷 月薪至少四萬七
飛馬今季只留麥基及陳柏衡兩個舊將，主帥就由上季教澳滌、當選最佳教練嘅李志堅擔任，外援就係由羅傑承老友、基士文介紹嚟嘅歐洲兵，包括馬其頓門將基斯贊、斯洛文尼亞後衞歷韋亞、塞爾維亞中場杜辛、黑山前鋒阿杜域同克羅地亞前鋒艾雲，呢班聯合國部隊噚日齊齊亮相。據講呢班外援好當打，人工全部要月薪6,000美元（約4.7萬港元）以上，當中踢過羅馬尼亞甲組布加勒斯特戴拿模嘅基斯贊仲代表過馬其頓國家隊六次，咁猛料，球隊當然好期待啦。
堅sir話，幾個東歐兵上周抵港仲未適應，初步睇，佢哋嘅技術同預期冇咩落差，但初嚟埗到始終要時間磨合。飛馬周五就同元朗拍跳，到時可以睇睇呢班東歐兵有幾勁。飛馬之後喺下星期約戰夢想駿其，完成後就拉隊去泰國集訓。
沙柏撐場 密會羅神
由於飛馬波衫嘅設計藍本嚟自曼聯，前紅魔球星沙柏咁啱喺香港，當然去捧吓場。沙柏撐完飛馬場後，就轉咗去旺角專門店繼續宣傳曼聯新波衫，除咗簽名外，仲走入人群玩自拍，搞到班魔迷鬼咁開心。
沙柏接受《蘋果》專訪，大讚紅魔新衫有復古味道，相信曼聯喺領隊雲高爾領軍下，有力挑戰車路士同曼城等強隊，就算今季贏唔到英超，下季都得喎。沙柏今次同經理人嚟香港嘅行程好緊密，除咗出席公開活動，原來仲搵商機，噚晚同羅傑承食晚飯後，今晚就會飛返英國。
