「為咗梁振英可以去到幾盡？」花生友呢排同政界中人吹水，個個都係講CY辣手換走曾德成同鄧國威嘅事，一如立法會主席曾鈺成所講，呢個突然其來換馬嘅舉動令人太心寒，有政界中人話，官場人人自危，點知下一個係咪輪到自己？而齊齊剝花生之際，花生友發現唔少政界中人都對事件有一個幾一致嘅睇法：教育局局長吳克儉認真好運，咁都避過一劫！
事實又係喎，如果論工作表現，花生友都聽過政界中人讚曾德成做民政好上心，唔少青年活動都肯出席，同下屬又會有偈傾，證明都有啲嘢想做。
至於鄧國威，就算話佢同公務員團體關係麻麻都好啦，政府內部都有唔少人話佢算係好好先生，而且都唔係唔做嘢，總之論hea嘅程度，肯定唔會喺局長之中排包尾。
梁粉陣營嫌連累梁振英
政界花生友講嚟講去，都係覺得梁振英若然要炒，都唔會冇吳得掂份囉，覺得呢個局長執包袱係眾望所歸，偏偏吳得掂就有得留低，咁又難怪左派同公僕圈都咁氣憤嘅，因為一個人係唔係被炒，原來唔係睇能力，而係睇聽唔聽話，咁成個政府搵晒傳聲筒做局長咪得囉？
之不過，花生友相信，吳得掂係留到呢半屆，都未必過渡到去新一屆，因為據聞連梁粉陣營都唔多like佢冇乜作為，唔會肯俾佢連累CY……當然，前提係中央仲支持CY爭取連任，而CY仲有選委支持囉。
周二、四刊出
花生友