黃色大軍《迷你兵團》（Minions）迷倒唔少香港市民，唔知佢哋如果變晒黑色，係咪一樣咁吸引？新鴻基地產旗下嘅沙田新城市廣場，上月起擺設多個Minions可愛大公仔，市民路過一定集郵留念。但前日展覽最後一日，有網民上載一幅多個Minions臉部被噴漆噴黑嘅相，留言「現實就是這般殘酷」。
Minions慘遭毒手，梗係惹嚟關注，有人話新城市廣場擔心公仔被偷，寧願自我毀滅。有網民批評廣場浪費資源，覺得可以捐畀孤兒院或其他慈善機構都得啫，唔使吓吓送去堆填區；就連學民思潮召集人黃之鋒都留言：「咁都得！？」
新城市廣場發言人回覆解釋，商場獲授權展示39件Minions立體展品，由於相關展品涉及商業版權，商場承辦商喺清拆時需根據協議處理，故此商場唔可以喺展覽結束後將展品送贈其他團體。但發言人補充，深明商場作為公眾教育平台嘅社會企業責任，過往舉行嘅展覽結束後，都有將不涉及商業版權嘅素材捐贈學校或慈善團體，多謝各方嘅寶貴意見。