財經事務及庫務局局長陳家強噚日朝早出席一個青年創業論壇，不過佢好似好趕時間，10點10分出現，交出一副含蓄嘅笑容，匆匆畀傳媒影幾張相，走上台講幾句，就喺公關陪同下一支箭咁閃走咗，全程大約半粒鐘多啲。梁振英早排連炒兩位局長，唔通陳家強好怕被人問到「被辭職」、「被退休」嘅事？
有傳民政事務局前局長曾德成因為處理青年工作不力而被退休，可能因為咁，陳家強都好識做，喺論壇上鼓勵年輕人到內地發展電子商貿之餘，亦提到政府會全力支持青年創業。咁啱前幾日財爺曾俊華發表咗一篇網誌，又提及青年人嘅創意係推動社會嘅動力。佢兩位財金官員應該都好想做好呢份工！