商台台慶騷「麥當勞騎騎騎大會串」前晚在灣仔會展舉行，林海峰、葛民輝、森美、小儀、少爺占、當奴和阮兆祥擔任演出。林海峰、潘小濤等《在晴朗的一天出發》主持先為台慶騷打頭陣做暖場嘉賓，接着森美小儀扮秋官和阿姐大玩《新地靚gag王》。
台慶騷以「唱雙簧」形式，唱盡政界和娛樂圈，少爺占在「艾粒之怪談怪談」稱有人話香港妖氣沖天、很恐怖，當奴稱找徒弟一齊將地獄使者打入地獄，但被成功upgrade變做劉江，少爺占即接口說：「嘩（華）！」當奴笑說：「佢仲要月薪30萬，好離譜，仲要帶咗好多手下搗亂香港，好似有寫真黨呀、蜥蜴黨呀、炒股嘅股票佬、手機黨同埋大媽。」少爺占再說：「香港呢幾年頭頭碰着黑，係因有孽，仲有人話妖氣沖天，因為有梁振。」雖然當奴截住叫他不要講名，但少爺占懶理再說：「香港變得咁灰因為CY。」
林海峰圓Fans願
傳因開騷力撐王維基而得罪無綫的阮兆祥扮成黃偉文（Wyman）現身，他說：「我為亞視寫咗首《明天我要摺亞視》，不過希望似湯告魯斯嘅《最後武士》。近排有套中國宮廷古裝片，冇前面、冇後面，亦都冇側面撞鬼個個封晒胸，唔知邊個鬼主意。」祥仔亦坦言：「相信政改會出現奇蹟，𠵱家50歲都出寫真係奇蹟。」
壓軸出場的林海峰和葛民輝，以頒獎禮形式向DJ致敬，在讀信環節邀請了一對母女上台，原來女兒知道媽咪是林海峰fans，但見到面亦不敢合照，於是趁媽咪生日希望林海峰代為圓願，結果成功。
完騷後，他們被問事前有否給高層審視，他們說：「有，但都係睇邊啲題材唔可以撞，因為講啲乜大家都唔會知，直到今日綵排先知大家講乜，唯一意見係大家唔可以講羅霖，因為個個都講，點知阮兆祥都係搶咗。」他們亦不覺得題材敏感，笑問祥仔會否擔心不能返無綫拍劇？他說：「我諗緊聽日返唔返到商台開工啫。」
採訪：王連連
攝影：陳順禎