新一屆泛民飯盒會召集人一職將於下月中換人，工黨派出何秀蘭頂替公民黨梁家傑出任。
阿Cyd話，工黨未成立之前，佢都試做過泛民召集人，今次佢係重操故業。佢話梁家傑過去一年話做飯盒會召集人一職係做阿四，但Cyd就大讚梁家傑其實做得好好，搞到佢好大壓力。
暑假復會後，立法會將踏入本屆會期最後一年，阿Cyd話最後一年會盡力營造飯盒會內嘅討論氣氛，令泛民就有共識嘅議題多啲行動，迎戰未來兩個選舉。
阿Cyd話只有泛民團結、建制分裂，泛民先能夠取勝，啱啱過去嘅大埔區議會補選就係最佳例子。何解工黨李卓人唔出任召集人一職？阿Cyd話阿人實在太忙，除咗係工黨主席，仲要搞職工盟同支聯會，所以工黨就派佢嚟擔大旗。