【本報訊】港大校董之一的民建聯立法會議員鍾樹根去信港大校長馬斐森，要求徹查學生上周二「非法禁錮」校委，並稱以粗口辱罵校委，可構成被控普通襲擊。不過，大律師陸偉雄指刑事襲擊必須有身體接觸，「算我孤陋寡聞，法律上我唔理解、亦唔認知純粹講粗口構成襲擊」。
當晚並不在現場的鍾樹根，昨在dbc數碼電台節目指當晚有人辱罵校委，「講晒粗口，甚至推人落地下」；又稱「非法禁錮校委半個鐘，造成身體傷害同心靈嘅傷害……你睇啲相都睇到，有啲校委好惶恐，而且過程中又拉拉扯扯，有人被拉爛衫、損手，想搵十字車嚟都阻撓」。
鍾指梁家傑「蹺手睇戲」
鍾向身旁的公民黨立法會議員梁家傑提問：「你作為大律師都知道，講粗口問候人哋，分分（鐘）俾人告普通襲擊。」梁沒回應。鍾又反駁上周辭任校委的港大微生物系講座教授袁國勇稱學生「純真」，「佢自己嘅學生就斯文、好學，但係好難分別講粗口就唔係自己人、打人又唔係自己人」。
鍾又質問梁家傑當晚在鈕魯詩樓地下平台，為何沒助劉麥嘉軒解圍，「個個蹺埋隻手睇戲，睇個弱質女流俾人哋鬧到面青青、騰晒雞、震晒，你哋都唔去勸阻一下，你會覺得呢啲人係抵死，係嘛？」
■記者倪清江