港大理學院院長兼物理系講座教授郭新新增一項威水史，佢喺夏威夷檀香山舉行緊嘅國際天文聯合會（International Astronomical Union, IAU）常務會議，獲選為太空生物委員會主席，協助IAU推動國際太空生物研究同籌辦相關教育活動，委員會主席任期一般為三年。
成立於1919年嘅IAU係太空天文學研究界嘅最高權威機構，由各國政府資助，致力促進各國共同探索同推廣太空天文學，亦係專為星體命名嘅認可官方機構。而太空生物則係現代天文學重要一環，探索領域由地球生物起源以至尋找外太空生物，郭新係國際知名嘅恒星有機化合物研究專家，相信可以幫到手。