超人李嘉誠一向工作冇停手，頭半年搞掂長和系世紀重組之後，最近又要處理意大利電訊合併、出售上海物業等等大刁，自然唔夠時間處理基金會嘅事，非常識做嘅紅顏知己周凱旋（Solina）最近就飛咗去美國，專程用手機直播帝國大廈嘅投影騷畀超人睇，畀佢睇基金會關注瀕危物種嘅工作成果，非常之貼心。
超人咁關心呢個投影騷，原來係因為負責投影技術嘅公司Obscura，係李嘉誠基金會有份投資嘅「玩具」，之前都有幫汕頭大學畢業禮做投影。而基金會亦係今次活動嘅主要贊助商，出資接近100萬美金，利用帝國大廈外牆投射出瀕危動物嘅巨型圖像，包括已被射殺嘅津巴布韋獅王「塞西爾」、雪豹等等。
為令留喺香港嘅超人都觀賞到呢場投影騷，Solina就用iPhone嘅FaceTime軟件，直播足8分鐘畀超人睇，難怪超人咁專心，直情除低副招牌眼鏡睇表演喇。
查實超人嘅基金會與維港投資一向都關心環保問題，之前就投資人造肉漢堡Impossible、植物蛋Hampton Creek等等。