有人認為抽水才是王道，冇靚抽冇朋友；又有人說未學行勿學「抽」，因為抽抽下唔抽，仲衰過從來冇反應，等同公關災難二次方。
自從社交媒體興起，傳統公關面對一個又一個挑戰。早年掙扎的是企業要不要開facebook專頁，開了，又要諗讓不讓路人隨意開post，或者，有人發負面評論，admin好不好刪帖。今天，問題已發展到既然「老正」的帖文冇人吼，完全唔啱網民胃口，應給admin多少權力「自由抽」。
上周抽水之最自然是盧寵茂醫生的抱膝倒地圖，幸福藥業和美麗華旅運都技癢落場了，但都不約而同在短時間內刪除抽水帖文，並出帖道歉。
不過，故事未完，你發完帖又刪帖，讚過你有guts的網民，大感失望，乜原來你的好玩抵死畫皮來的，鍾意戴下，唔鍾意又除低㗎？咁咪即係欺騙我感情！網民鼓譟，可以預期，至於美麗華旅運轉頭連道歉都刪埋，自然又俾人鬧多鑊。
所以，閣下品牌決定參不參與這高難度遊戲前，真的要三思。剎那光輝，不是永恆。決定落場前，起碼要為自己管理層做壓力測試，撐唔起嘅，無謂扮玩得；還有，最緊要是抽這種水要和品牌形象和性格脗合，太過勉強，陰陽怪氣，始終無幸福。
識抽，就要學樂視（Letv)，人家一樣有抽同一條水，但當你們怕到要刪帖，佢就發「聲明」，話由於靚抽引起讀者興奮，極度欣慰，故該帖子將不會被刪除。仲話有讀者話唔刪帖就買Letv電視，一於入定貨等網民找數云云。同留言網民對答，啜核到痹，一句「多謝支持，祝你今日“幸福”同“美麗”！」抽上抽，死未？貴公司玩唔玩得起先？
彭瑪莉
mailto:[email protected]