為咗選舉，民建聯真係可以去到好盡！有市民近日喺中西區街頭，見到民建聯社區幹事楊學明嘅人形紙板一字排開晒冷，佔咗三分一條行人路，被阻路嘅居民梗係呱呱嘈，仲有人向食環署舉報。民主黨成員陳展浚噚日亦喺「西環變幻時」facebook專頁貼出紙板陣相片，畀大家睇吓場面幾咁壯觀。
楊學明接受傳媒查詢時透露，花咗3,000蚊左右整咗約20個紙板，出動人海戰無非想街坊對佢上年嘅地區工作留下深刻印象。楊學明上屆區選喺水街選區輸咗畀民主黨黃堅成，今屆預料挑戰接黃堅成棒嘅伍凱欣。
有網民話噚日下午啲紙板已經消失，唔知係自行摺埋抑或食環署做嘢嘞。