要講近日城中紅人，非港大校委會成員盧寵茂莫屬，佢仲係網絡界紅人㖭呀，facebook出現大量佢跌低嘅改圖。唔講唔知，盧寵茂係名醫，佢太太Amy Lo（盧彩雲）亦係金融圈頗有名氣嘅投資銀行賓架，客戶包括唔少大孖沙，聞說盧太年薪應該過千萬元，除非唔係。
靚太Amy Lo係歐資大行瑞銀（UBS）嘅財富管理大中華區主管及瑞銀香港區主管，佢呢個部門專門替超級有錢人管理資產，聽講佢嘅大客包括「娛樂大亨」林建岳、華置（127）大股東劉鑾雄（大劉）等等，不時都會跟呢啲大孖沙食飯。
瑞銀已經計劃加強佢呢個財富管理部門，喺尖沙嘴租落寫字樓擴充業務，可想而知Amy Lo幾咁吃得開。
賣樓利潤近3,500萬
盧寵茂曾經喺專欄透露，佢30年前喺香港大學聖約翰堂認識太太，Amy Lo當時係校花，裙下之臣不計其數，佢慶幸贏得美人歸。婚後，盧醫生工作忙碌，Amy Lo負責料理家中事務，並照顧一對仔女，佢形容太太本來就性格果斷，之後變得更加獨立自主。有跟Amy Lo共事過嘅賓架都形容，佢相當做得嘢，管理能力一流。
聽聞Amy Lo年薪應該過千萬元，不過翻查紀錄，佢與盧醫生在港所持物業唔多，目前名下只係持有九龍站凱旋門一個約1,800平方呎嘅高層單位。其餘物業，佢哋持貨超過兩年後就會高價沽出，賣樓累計獲得賬面利潤接近3,500萬元，投資有道。
李華華
mailto:[email protected]