私隱專員蔣任宏舊年「勇武」點名爆商經局去信訓示，今日冇得留低要講拜拜。八方唔敢斷定兩者有關係，但相信蔣專員真係視「公平公正、不偏不倚」為做人原則。憑乜咁肯定呢？
話說蔣專員原來有鋪儲物癮，淨係公署辦公室都擺咗大中細三個泰美斯女神像。泰美斯女神即係舊立法會上嗰位正義女神，喺古希臘神話當中象徵正義同法律。蔣生話最細嗰個係廿幾年前年輕外遊時購自希臘，大同中嗰兩個就喺在任專員期間，分別喺台灣墾丁大街同波蘭華沙入貨。佢話好鍾意儲呢啲塑像，同𠵱家啲後生鍾意儲機械人模型差唔多，只不過年代唔同，目標各異。除咗正義女神，蔣生話其他希臘神話角色都係心頭好，最估唔到係連關公像都有興趣。