中國「暴力救市」，愈來愈似係一場財經笑話，一向主張救市嘅石鏡泉（經濟日報7月29日）稱「國家隊」為「豬隊」，華爾街日報話中國缺乏一個格林斯潘咁嘅人物，連歐洲央行行長德拉吉咁嘅人都搵唔到。
中國何來咁有公信力，一言九鼎，講兩句就可以安撫財金界嘅人物呀？中國係一黨專政國家，黨大於國，黨大於法，中國人民銀行（央行）行長從來在共產黨內嘅地位較低，永遠入唔到政治局，毫無威勢。現任行長周小川已經算係財金圈內受尊重人物，仍然無資格講太多嘢。中國經濟與政治分不開，習大大先至係最高領導，總理李克強平時少講政治，多講經濟，算係經濟金融政策之首席營運官，但佢吩咐落嚟嘅「暴力救市」顯然係思慮不足，只係蠻來。中國話美國、歐盟都有救市，有乜稀奇？但歐美救市，只係央行印銀紙，放寬銀根，在市場買入債券（以公債國債為主，即注資入銀行體系，向銀行買入債券），並非在股市見貨就掃，買入數以萬億人民幣嘅股票。歐美式救市係盡量不違反市場原則，基本上沿用凱因斯理論，用極寬鬆貨幣政策令市場得到超豐裕流動性，降低利率嚟吸引投資界入市買股票。
中國證監就忘記自己身份與功能，直接指揮，下令券商上繳資金，再由央行支援，由中證監直接入市買股票，力托三大指數，據報道話有三萬億元人民幣做子彈咁話。三萬億聽起來，好似好多，但內地市場在高峯時每日成交二萬億，現在每日成交一萬至一萬三千億，三萬億用得幾多日呀？中證監而且下令各國企只准買入股票，民企大股東只可增持不可減持，即係用錢有出冇入，魚塘之水可以維持得幾耐？因是之故，救市不到一個月，就不時傳出國家隊退市嘅消息，令上海深圳股市大跌，國家隊被迫入市買貨，想話唞吓氣都唔得。咁嘅情況在過去三個星期，逐漸形成常態，股市不知到幾時先至可以上番5000點。中證監買下咁多股票，以後如何處置？一出貨，個市就會散。長揸不沽，就冇晒流動性；不可不知，A股派息比率偏低，股息收入甚為可憐㗎。中國財金界決策人雖然比以前開放西化，但腦子裏仍是共產黨可以指揮市場嘅思維，以計劃經濟方式管理資本主義為本質嘅股市，就如蠻牛追馬騮，唔係撞死馬騮就係俾馬騮之跳紮功夫玩殘。