灣仔鵝頸橋街市外商販出位擺賣，經常出現人車爭路。不過噚日食物及衞生局局長民望高高永文，落區到以打小人出名嘅堅拿道天橋底，主持全城清潔運動活動。八方同事話，唔怪得前晚食環署人員，已指示承判商預先洗個太平地。
高局長駕臨時，平日擺晒出街嘅商販，唔只全部自動波縮番晒入舖，暫時收起擺出街嘅鐵板，成條街仲洗得乾乾淨淨，幾乎一塵不染。
高局長講話後，仲親自落手落腳，去到鵝頸橋街市條橫巷洗太平地。食環署早已準備好口罩同全新掃把，地上留番少少積水，配合洗街車開住條大水喉，局長去到邊射到邊，等局長為全城清潔運動，叫做出咗一分力。