前經濟發展及勞工局局長葉澍堃2007年退休後，搖身一變，成為飲食專欄作家，經常跟太太周遊列國或者在港四出搵好嘢食。佢笑言，𠵱家出街遇到市民搵佢合照，多數因為有睇佢嘅專欄，並非記得佢曾經做過官。
雖然佢食盡各地美食，但令佢最懷念嘅，竟然係一道焗豬扒飯，尤其係大家樂（341）出品。
佢憶述，小時候家境一般，豬扒已經屬於矜貴食材，每次開飯有豬扒做餸，佢就會十分高興，令佢對豬扒特別有好感。
畢業後去到政府工作，由於十分忙碌，特別係2003年要應付沙士嗰年，有時忙到冇時間食飯，經常要麻煩同事幫佢外賣一個大家樂焗豬扒飯醫肚，佢每次都會食到一粒飯都冇剩，所以焗豬扒飯特別容易勾起佢以往喺官場嘅點滴回憶。
𠵱家佢生活逍遙，當然唔使再匆匆忙忙食外賣焗豬扒飯，但佢偶爾都會走去大家樂堂食，或者喺馬會嘅餐廳叫一客焗豬扒飯，懷念一番，事關佢係馬會董事，佢打趣說，不時要入馬場做佈景板（頒獎盃時一齊影相），有時都會食馬會出品嘅焗豬，慰藉心靈。
記者：高淑嫻
