若果你覺得6月跌得瘋狂，上月嘅七翻身變七揸兜更顯得無地自處。中央上月初暴力救市後再嚴查沽空，中、港股市上月埋單計，港股蒸發逾1,600點，滬深兩市合共計累跌15%，為6年來最大單月跌幅。中央億億聲嘅救市行動未果，但輸得最甘係中央政府信用都一鋪清袋。
中央為撐起股市，市場原理都放埋一邊。中央上月下達護盤令，滬綜指4500點以下券商不准沽貨，實情係滬綜指月中重見4123點左右又碌番落嚟，股民們都心諗：「乜唔係阿爺會接貨咩？」7月最後一個交易日，滬綜指4500點鐵頂守唔住，收報3663點。由此可見，中央救市演變成一個自我毀滅嘅循環，內地股市甚至出現一種旁觀者效應，就好似喺街度有人暈咗，圍觀旁人多，真正伸出援手嘅人少，令幫助受害者嘅責任感都逐漸消失，最終都唔知邊個負責。
一隻追蹤美國上市嘅中資科網同電貿「新興市場互聯網及電貿ETF」，喺內地股市大跌下仍然企得穩。滬指由6月高位跌近三成，此ETF期內只跌16%，年初至今仍錄得6%升幅。隻ETF追蹤中資股包括喺美國掛牌嘅阿里巴巴、百度及同城58.com。強國股市想達到國際級水平，獲得投資者信心，大前提係需要建立一個更成熟同透明嘅交易制度做買賣。
C+B
本欄逢周一刊出