特首梁振英早前向泛民主派伸出會面的「友誼之手」，另一邊廂其新聞統籌專員馮煒光卻就鉛水風波出手打擊民主黨立法會議員黃碧雲、梁又續批表明不參與創科局拉布的泛民議員。據知曾有泛民議員私下問特首辦中人，梁是否真的想修好？部份泛民更質疑梁所謂與泛民修好只是一種掩眼法，實質為區議會選舉前，進一步打擊泛民設局。
擺明車馬抹黑泛民
有泛民對季陶說，馮煒光早前在fb向黃碧雲開拖，懶理黃已解釋為慎重起見，不想貿然公開化驗結果，民主黨極為不滿，私下向特首辦中人表達憤怒，「呢頭話歡迎溝通，嗰頭擺明車馬抹黑，算乜意思？」
另一泛民中人稱，早前有報道指，梁能否成功連任，取決於在立法會及區議會選舉能否再大幅削減泛民議席，再加上梁對泛民是「公開溫和實際敵對」，已令不少泛民對溝通存在強烈戒心，甚至有人認為，梁今次是設局「裝泛民彈弓」：「公開同市民講，我（梁）係好有誠意同泛民合作！你睇我，又約泛民又聽意見；到咗選舉，政府、建制派就可以大條道理話，泛民為政治理由，唔回應政府善意，搞亂民生……仲唔係陰啲陰啲搞泛民？」另一泛民中人則呼籲別對梁有幻想：「唔好忘記梁振英公開叫市民用選票將反對政府嘅泛民議員趕出議會！」
季陶
周一、三、五刊出