一年容易又中秋，但要搶購大酒店（045）旗下、半島嘉麟樓嘅迷你奶黃月餅，就一啲都唔容易。今年，半島特登請創製「奶月」嘅葉永華師傅到上海賣餅兼做宣傳，仲要喺月餅盒上送親筆簽名，唔知可唔可以分流到，準備來港「搶月」嘅大媽呢？
做點心、月餅做咗幾十年，相信葉師傅勢估唔到，要做埋月餅代言人。半島話，葉師傅本月定期喺上海半島酒店大堂嘅賣餅櫃枱出現，同廣大嘅大媽打招呼；如果買滿50盒，其中一盒仲會有葉師傅大大個親筆簽名。
上海半島出品嘅「奶月」，由酒店中餐廳逸龍閣手做，製法跟香港嘉麟樓一樣，8粒裝嘅逸龍閣「奶月」賣388元人民幣，同香港嘉麟樓賣485港元差唔多，仲有創製人親筆簽名嘅月餅盒，大媽一於喺上海排隊買喇。