恒隆地產（101）上星期舉行業績記者會，老闆陳啟宗依舊寸嘴，冇乜特別，華華反而留意到陳啟宗身邊兩位高層，即係董事總經理陳南祿與執董何孝昌都係戴住同一款領帶，恒隆幾時有公司tie嘅呢？原來呢條tie仲巴閉過公司tie，係「哈佛陳曾熙公共衞生學院」紀念tie。
陳啟宗與細佬陳樂宗成立嘅晨興基金會，舊年向哈佛大學捐出27.3億元，哈佛為紀念呢次破紀錄捐款，將公共衞生學院以陳啟宗爸爸陳曾熙命名。
年輕一輩嘅股民對陳曾熙認識唔多，陳啟宗早前喺哈佛出席活動時就自嘲話「看我的個子，你會訝異先父竟是昂藏六尺……」嘩，呢個佢唔講真係唔知，照咁講，陳啟宗應該係似陳媽媽嘅細細粒身形啫。斷估點都唔會好似齊昕所講，話自己可能係喺垃圾桶執番嚟囉。