文詠珊（Janice Man）、許志安及林家棟等，昨日在西貢為電影《兇手還未睡》進行開鏡拜神儀式。全力進軍影圈的JM，透露今次將會有從影以來首次突破其底線的演出，除了拍強姦戲外，更會有裸露鏡頭，她說：「今次係因為導演邱禮濤，我相信佢嘅為人，加上我都想有突破性演出，不過唔係為性感嘅，係劇情需要，係自己未破過嘅底線，前後都會有，但就唔會露點嘅。」JM透露前日已經開工並說：「最難嘅係要勾起女性內心嘅恐懼，喺瀕臨崩潰狀態，我好想挑戰自己係咪駕馭到個角色，但真係好難。」
早前本報報道過JM將執梁洛施二攤接拍《寒戰2》，她表示事前不知情並說：「收到劇本之後覺得角色好有發揮，加上同兩位導演都認識，自己唔會介意，好多時啲角色都會調換。」
另一方面，JM的舊愛李冠鋒被拍到搭上郭穎兒（Celia K.），她笑說：「想唔知都唔得，個個都提。其實已經好耐冇聯絡，咁out，你哋問番佢啦。」不過提到與男友吳啟楠（Carl）的發展，JM甜笑說：「好忙，但好開心，同佢係了解中。」至於接拍此片可有問男友意見？JM說：「我淨係問咗自己，連父母都冇講，佢哋會支持我。」
安仔操肌拍親熱戲
至於在戲中與JM有親熱戲的許志安，坦言將會做運動操肌，增強視覺效果，問他會否在戲中「晒鵰」？他笑說：「唔使喇，觀眾都係想睇Janice Man多啲。」再問有否向老婆鄭秀文備案？他笑說：「工作唔使，如果同佢講，佢會話如果導演叫到就要去盡佢。」
林家棟則自爆戲中飾演雙性戀者，與組合廿四味成員阿肥有感情線：「表面上佢係我司機，實際佢係我玩具，係hehe。我同Janice Man亦會為咗生小朋友而結婚，仲會同舞小姐廁震，又會強姦蔡潔。」家棟又爆圍讀時，JM曾向導演提出劇情可以再激一點。
採訪：譚倩宜
攝影：仇志德