【本報訊】在港大學生衝擊事件中跌倒的校委盧寵茂，昨不點名指控在場校友歐耀佳醫生忘記救人天職，見盧遭圍困卻置身事外。然而現場片段證實，歐耀佳曾多次叫人群讓路給盧，但在場人士未有理會。歐向本報表示，他相信盧真的受傷，但質疑盧未弄清事件就對他作嚴重指控，「係佢自己攞嚟衰」。
記者：白琳
盧寵茂昨接受商台訪問時，慨嘆政治令部份校內外人士變得瘋狂。他跌倒後遭指罵，「仲要嗌我無恥，我受傷，邊度無恥？」他促兩方政治勢力遠離港大，「兩方面如果要鬥，離開香港大學啦，去番街度。唔好再以為自己啱晒，大家坐低傾，唔好鬥大聲、鬥暴力」。他擔心武力抗爭蔓延至醫院甚至法庭，日後或出現「佔領法庭」。
現為醫學院外科學系系主任的盧稱，令他傷心的是一名醫生見他遭圍困卻未能解圍，「我曾經想叫佢幫我叫開啲人，佢居然第一個反應係：『關我咩事？嗰啲人唔係我叫嚟！』點解政治鬥爭令一個醫生將救人天職完全唔記得？」
「呢啲唔係我哋搞出嚟」
事發當晚參與校友靜坐的歐耀佳向本報憶述，當盧被另一校委袁國勇護送至會議場地鈕魯詩樓外時遭包圍，「空中有水樽掟出嚟，嗰啲人我感覺唔係港大校友，好多街外人圍住（盧）粗口爛舌。有欄杆遮住，我埋唔到去，就跳上欄杆。袁國勇話佢整親右腳。我知佢右腳傷過。」歐三番四次大叫讓路，「真係冇人理我」。
根據事發片段，當時盧正接受記者訪問，歐向盧解釋：「呢啲唔係我哋控制。」盧答：「係你哋搞出嚟。」歐反駁：「呢啲唔係我哋搞出嚟，係校委會所做嘅工作。」袁則促歐幫忙開路，歐答：「我係醫生，唔係負責幫手。」但也繼續嗌咪：「盧教授係有受傷，唔該大家畀番條路！」
歐向本報續稱，他呼籲讓路不果，惟有交給保安及警察處理，「好多人扑咪同佢講嘢，未必見到我叫人走，可能佢覺得我好似唔理佢。我當時判斷係，你對答冇問題，唔係心臟病發、中風。你成日打波，咁大個人，瘀傷撞唔死人。我交畀警察係完全做啱」。
歐形容盧對其誠信和操守的指控非常嚴重，但盧最終只會「discredit自己（敗壞自己信譽）」，「我唔開心反而係，你咁大嘅大學教授，好似走投無路，喺行內學生真係冇咗credit（信譽）。佢真係忘記咗佢係公眾人物，講呢啲嘢，我覺得佢好可憐」。歐就讀港大醫學院時與盧住同一舍堂，「我係咩人，佢好清楚。佢咁樣指控我，自己攞嚟衰」。
另一在場校友、大律師陳淑莊稱，當時歐曾接過她的大聲公呼籲人群讓路，「政治真係唔知令幾多人瘋狂，我唔知佢（盧）講咩叫武力，誣衊人、（校委會）程序暴力，都係好暴力」。