Juno嘅《羅生門》三部曲大熱，將十年前嘅《耿耿於懷》故事打破，究竟主角係一個痴線佬定癡情男，其實都未有定論，總之男方嘅一廂情願，女方嘅斷言拒絕(但又想好落台)，其實情境都似另外一個三部曲---就係陶傑嘅「Come on James」。
近日就有組織將《羅生門》crossover「Come on James」，歌詞畫面相交配合得唔錯之餘，把女聲仲好似謝安琪，唔少網民都覺得呢個改編極好，其實「首部曲」「Come on James」係來自陶傑04年一篇講副學士嘅文章《大學四年制》，內容係講一個升到大學嘅港女，同只能升副學士嘅男友距離越來越大(當然係講緊經濟上)，典型港女嘅女主角，一口夾雜英文嘅廣東話，口講唔係介意錢，但就要狠飛讀唔到大學嘅男友，由於故事太現實，佢嘅一句「Come on James」成為潮語。2013年仲有組織將「Come on James」拍成短片，將成個攤牌情景拍出嚟。
其實當女主角叫男主角「Come on James，你可唔可以成熟啲?」套落《羅生門》女主角度，真係好夾，想像下謝安琪話:「Come on James，我冇鐘意過Hello Kitty囉!」(個囉字要重音)