有時候老竇老母俾仔女激到氣上心頭，乜嘢「生嚿叉燒好過生你」、「喺垃圾桶執你返嚟」晦氣話都講得出。唔知近日特首之女梁齊昕係咪做咗啲嘢激親父母？佢噚日凌晨喺facebook話喎，父母經常話佢喺街邊垃圾桶執返嚟，而佢覺得唔係講笑。講起垃圾桶，網民群情洶湧，唔少人問，唔通CY女真正老竇係劉江華？
查實齊昕喺facebook不時都語出甚至「相」出驚人，例如貼𠝹手相，又留言暗示自殺。最近CY同太太離港放暑假，被讀者發現去咗芬蘭，八方唔知齊昕有冇一齊外遊，但似乎佢又唔開心喇，噚日凌晨時分喺fb留言：“I think I should see a doctor about my clinical weirdness. Like, am I even biologically related to my siblings..???”（我諗我要為我嘅怪異去睇吓醫生，其實我生理上同我嘅兄弟姊妹有冇關係?）
自嘲係兄妹中異類後，齊昕之後嗰句仲爆：“My parents have always said they adopted me from a bin on the street. Don't think that's a joke anymore.”（我父母成日話我係喺街邊垃圾桶執返嚟，我𠵱家覺得呢樣真係唔係講笑。）
新聞處抽劉華水
網民當然為此垃圾桶論議論紛紛，唔少人留言叫齊昕不如出走，自力更生仲開心，有人亦話呢啲火遮眼說話，為人父母不時會講，勸齊昕唔使咁上心。但更多人呢，卻係將呢件事同人稱劉華嘅新任民政事務局局長劉江華扯上關係喎，「可能你真正老竇係劉江華」。躺着也中槍嘅劉江華，唔知嬲唔嬲呢番話？而佢噚日出席全民運動日活動時，就話市民之間少啲爭拗、多啲運動，就會身心健康，香港第一家庭似乎都適用。八方仲發現，政府新聞處facebook報道劉江華同大媽一齊喺全民運動日做健體操時，標題係「全民運動日，劉華局長與民同樂～～」有網民旋即又貼垃圾桶相贈興一番……
李八方
mailto:[email protected]