李澤楷旗下nowTV的免費電視台香港電視娛樂（港娛），前日獲通訊局批出亞視「釘牌」後其中半條頻譜，代表觀眾毋須用機頂盒都可以直接收看電視節目，最快明年4月2日便可以開台啟播。
現在nowTV裏裏外外都要重整旗鼓，之前傳102觀星台將於今年9月底關閉，部署開免費電視台。由於好多事未有定案，就連戲劇部都要延遲開拍號稱花近億人民幣製作的古裝劇《舉世無雙》，這部劇原定今個月開鏡，但現在連男女主角都未落實，照計算，nowTV現有劇集只得兩年前舊作、由林峯、王珞丹、周麗淇主演的古裝劇《衛子夫》，這部劇在內地好多電視台都播過，今年初亦在nowTV的100台收費電視頻道播放廣東話配音版。
《舉世無雙》明年初開鏡
雖然無限loop了好多次，但這部劇收視和口碑均不錯，今年6月更在林峯廈門老家獲「第七屆海峽影視季」頒發最受台灣觀眾歡迎的大陸電視劇獎項，難怪編劇梅小青對劇集滿有信心，昨日在電話中說：「都要睇公司安排，但我當然希望咁做，因為古裝劇冇時域限制，唔似時裝劇擔心唔update。呢部劇內地收視同口碑都好好，之前nowTV觀眾層睇過，更希望推廣去大氣電波，畀多啲香港人睇。加上我哋邀請演出嘅都係當時得令演員，除林峯外，王珞丹𠵱家係電影卡士演員，最近喺內地連播三部劇，人氣好高，我都希望可以做到開台劇。」
為何《舉世無雙》要延拍？梅小青解釋：「因為天氣問題，夏天拍會好熱，現預計要明年新年後先開鏡。」
採訪：嵐山