要搵個肯陪你捱麥記嘅女友，其實唔難；但周年紀念日都肯去快餐店食炸雞嘅，就真係可遇不可求。本身已經係人生贏家嘅勇士控衞史堤芬居里（Stephen Curry），早幾日係佢同太太艾爾莎嘅結婚四周年紀念，慶祝活動竟然就係食炸雞！
今年已經27歲、但個樣仲好似未成年𡃁仔嘅咖喱仔，果然係個大細路。話說前幾日係佢同太太艾爾莎嘅結婚四周年紀念日，兩公婆食大餐慶祝嘅地方，竟然唔係嗰啲指定要着恤衫打呔先入得嘅超豪華高級餐廳，而係平民熱點、連鎖快餐店Chick-fil-A。
老婆冧爆：為我人生調味
老公身為應屆NBA總冠軍成員兼最有價值球員、來季年薪有成1,100萬美金（約8,500萬港元），但結婚周年紀念帶你去食炸雞？艾爾莎一啲不滿都冇，反而非常受落，事後仲上instagram大放閃光彈，配埋sweet爆留言：「你就好似啲炸雞咁，為我嘅人生調味；期待未來嘅四年、40年，我哋仲會一齊經歷啲咩。BB我愛你！」其實咖喱仔細個已經好鍾意食呢間快餐店嘅炸雞，今次就證明咗，佢並冇因為𠵱家名成利就而變土豪，仲會同以前一樣咁鍾意食平嘢，果然夠晒專一。
咖喱仔作為頂級職業運動員，都夠膽食垃圾食物，而個幾月前先生完第二胎嘅艾爾莎，又唔會因為怕肥而唔肯食熱量超高嘅油炸嘢；其實，幸福就係咁簡單。不過，首先你要搵到個咁啱key、咁有默契嘅另一半……