前一輪建築邦話屋企要裝修，以為佢會搞好耐，點知兩個月左右，已經話請我地到佢屋企吃飯，乜今日工人缺乏之際，屋企裝修會咁有效率呀？哦，淨係裝修個廚房箒，其他不變。建築邦別無嗜好，少購雜物，去馬會只係飲食，賭馬唔係佢杯茶，平時最鍾意嘅，就係周末去大埔街市買餸，自己到廚房督工，整番幾味，佢話人人有壓力，減壓方法各有不同，對佢嚟講，入廚房就係減壓最佳方法。
於是我地參觀佢個煥然一新嘅廚房，特色就係新廚具，新大型雪櫃，及兩個最新款先進多功能焗爐。呢日佢特登在大埔街市買咗兩隻活雞，一蒸一焗，在西餐廳吃焗雞，並非上菜，但此晚隻焗雞，嘩不得了，既嫩且滑，加埋一啲秘製醃料，搞到人人搶吃，相形之下，令隻蒸滑雞稍欠風采。建築邦話：「西餐廳焗雞，肯定係冰鮮雞，點同我地用鮮雞呢？」係唔同嘅，單憑此理由，我地一致反對一啲醫生講：全港禁活雞。
建築邦講及一班老表話要到灣仔大榮華搵肥佬韜食餐勁嘅，唔知邊位收到消息，話大榮華有罕見馬來西亞河鮮「忘不了」，一世人要食一次。上網查吓乜嘢叫做忘不了，有篇2014年嘅蘋果日報特別報道，指忘不了係極難捕獲嘅河鮮，蔡瀾大力推介之後走紅，林建岳特登坐私人飛機去馬來西亞試食咁緊要。於是群推大記者去搵廚神韜哥，韜哥話搵到來貨先至訂位啦。佢係有辦法嘅，後來回電通知搵到忘不了，大可搵齊人到灣仔大榮華。哎吔，左丁山事先唔知，錯過機會。建築邦嘅大姑丈反為從仔女中聽到消息，81歲咯，都要參加埋呢餐忘不了宴。十幾人吃完第一味玻璃糯米乳豬全體，再吃西山欖仁縐紗魚肚，已經飽飽地，還有六味菜及單尾甜品未食，韜哥醒目到暈，見狀立即叫上「清蒸忘不了」，三斤半重，售價2500元一斤，建築邦讚條魚蒸得啱啱好（韜哥話自己在廚房督師蒸咗30分鐘），十分鮮味，但食得出係冰鮮，並非游水魚。韜哥話：「冇辦法啦，飛機運過嚟，要冰鮮-18度，我地收貨後，放在雪櫃又係校-18度」。眾人此晚食到肚滿腸肥之餘打包十袋八袋，然後埋單，每人要夾金牛一張，點知大姑丈大聲一喝：「夾乜嘢錢呀，今日我食得高興，以後忘不了，由你地班後生夾錢，我咪冇得威？一於我請晒。」眾人自不然三呼萬歲，就由得大姑丈威咯。佢係車頭玻璃界行尊，土瓜灣邊個唔識？左丁山大嘆走寶之餘，對建築邦講：「以後不如畀機會我帶大姑丈去威完又威！」