「紅魔鬼」曼聯上周六改朝換代，唔係講佢哋又炒領隊，亦唔係買入咩巨星，而係波衫正式由一剔轉投三間，曼聯新合約就收到呢個德國品牌一年7,500萬鎊（約九億港元）贊助費，係全球足球球會最貴，理應出盡力宣傳，不過當家射手朗尼、人氣新星迪比都唔係adidas旗下，所以紅魔鬼官方推出嘅新一輪造型相，都係由中場小豬舒韋恩史迪加同桑馬達等孭飛，睇吓今夏買咗唔少球星嘅紅魔，可唔可以借新波衫個勢爭逐英超寶座。
如果係紅魔鬼球迷，之前都應該喺網絡搵到呢件新衫樣辦。今次正式推出，官方就有更多完整描述，包括新衫嘅設計概念嚟自80年代，好似大V領、膊頭嘅三間條紋，另外衫腳就有暗花，向91年出道嘅傑斯所着球衣致敬，當然新波衫就用現代化物料，更輕巧耐磨。玩得復古，曼聯眾將好似小豬同桑馬達，都拎曼聯吉祥物「Fred the Red」支叉嚟影相。
雲高爾下令賣迪基亞
不過門將迪基亞會唔會着新門將衫就有疑問，據西班牙《阿斯報》報道，曼聯領隊雲高爾對有離心嘅迪基亞失去耐性，已經向會方提出要求，希望曼聯可以早日將佢賣畀皇家馬德里。
香港方面，adidas旗艦店同專門店已經有得買，球迷版賣$629（見附表），樓上波衫舖就最快下周一有貨。Kitroom Sports老闆Kan就話，曼聯多球迷，已經預訂咗300件，預期銷量好；印字方面，新兵相信較受歡迎，特別係德國中場小豬。
沙柏訪港即賣口乖
另外，曾協助曼聯三奪英超嘅名宿沙柏，噚晚就喺adidas中環運動基地，擔任adidas cup 2015頒獎嘉賓。對於新一季展望，沙柏話最大威脅相信都係車路士，預計前四競爭會好激烈。對於新波衫，沙柏就話曼聯喺adidas球衣年代拎唔少好成績，希望球隊今次再次重返呢間贊助商，可以再創佳績！而沙柏會留港四日，睇吓魔迷今次有冇機會捕獲佢。
